قصيدة مفيدة

الشعر ماهو وفاء والمدح ماهو كثير
يالي بفعلك تجاوزت الصور والصفات
ان قلت مثل البشر وشلون مالك نظير
وان قلت منت بنبي وشلون لك معجزات
يشوفك المجد في عين الرفيق الخشير
ويشوفك الناس بعيون وغلا وامنيات
ماصرت الاول ولاصرت بعطاك الاخير
لان مالله خلق قبلك وبعدك حيات
ياصعب من الدين في عين الفقير الستير
واسهل من البطش بعيون الملوك الطغات
والعب من السيف في كف الشجاع المغير
واثبت من طويق وابان الحمر والسرات
والذ من صافي العذب القراح الغدير
وامر من علقم الايام والمقبلات
ياراس مالي اليا ضاقت وقل الكثير
اي والله تعيش يا مال الظفر والغنات
يالي لك بقلب مغليك المكان الوثير
طهارتك خلق والباقي عليك الصلات
صلي بحنياه واشفع له وخلك قرير
قلبً يا لو لا مواقيفك معه كان مات
ليت الغلا بالذمم ماهو بقلب وضمير
كان احلف انك على اغلى من الغاليات
وليت الوفاء معك وقفات تحدد مصير
وليت العطى منك بسمات تلملم شفات
وليت السفر معك لا خر مايجي بالمسير
وليت الحكي معك لابعد من حكيا الروات
يجذبني لكل طيبن فيك سلك الحرير
ويغريني لمدحك لشعري كلام الوشات
ايه اكبر بفعلك الي في عيونك صغير
وايه اصغر لكل دمعه من عيون البنات
يالفارس الي عطاك الله سيفً شطير
وكرمت نفسك عن مطاعن عيال الرعات
في كل كفر خلى لك روض مزهر وبير
وفي كل حلق حسدون لك عظم أو حصات
تذبح لك هجوسنا في كل طاري بعير
وتشرب لك اقلامنا في كل ليله دوات
تعطي عطى الي مع الايام عمره قصير
وغير الدعاء ماخذيت الا قلوب الثغات
يالنادر الي قطعة السبق قبل الجرير
مكانك الغيم لا ضاقت بك النايفات
البارحه جاب لي طاريك ريح العبير
وهب الهواء في مقاديمك من اربع جهات
حت تصوفت بطيافك وقلت استخير
ابي اكسب الذات واخسر بك عيال الذوات
جيتك وانا الشاعر الي ماقراه الغرير
ولاتنكس على ابياته وهز العصات
جيتك وانا الشاعر الي من عسيب الحصير
وصل من المجد ماله تاصل الناطحات
ايه انت وهبي يانفس الذليل الحقير
ايه انت والا فلا للجود بعدك سمات

شكرا لك على القصيدة المفيدة واصل تالقك